行個山啫，駛唔駛又當下、又珍惜咁心靈雞湯呀？但當你踏上這條古道，看到偉大的工程破壞漂亮的美景、頑強的村民寫大字報為自己的土地抗爭、零落的「遺蹟」提醒你此道的歷史⋯⋯你會發現，當下我們所有的，正在一點一滴地流逝，而當我們無法再擁有，或許，就只能捉緊還在手中的當下。
近年流行行山，所以好多古道都被人搵出嚟學古人咁行返轉。東梅古道顧名思義就係連結東涌同梅窩既古道（估通你以為條路有東梅食咩～）呢條路唔多聽朋友提，但其實政府無厘頭地在2008年京奧時將呢條路由白芒至梅窩一段改左名做「香港奧運徑」，沿途仲砌左11種運動項目既標記。（在下無乜興趣集齊一套，所以無乜留意有邊11種，有興趣既朋友歡迎通知一聲）不過把古道修整、鋪上石屎，也算是一項德政。
好，前言講完，講返點行先。
理論上，東涌同梅窩係隔住個大東山既，但古人當然唔會爬上大東taste完芒草至去梅窩啦。所以佢地就揀咗條經過牛牯塱、亞婆塱既路嚟行，叫得做塱，就係低地，所以是好好行的。
首先，由東涌東薈城出發，在三樓商場一直向藍天海岸方向，一直走到戶外的連接天橋時，向右轉落樓梯往文東路。在文東路沿着藍天海岸、映灣園一直往前走。
這段路起初兩邊有樹，風景和環境都算不俗，不過大樓在旁虎視眈眈，總有點壓逼感。
走到映灣園末端會看到喜東街，轉進去就會見到油站。
去到油站要找一個偏僻的入口，因為官方嚟講，東梅古道東涌至白芒一段係做緊工程既，所以個入口有啲奇怪。
經過一個亂亂地既車場之後，就係一段無遮無擋的大直路。有人可能會覺得沉悶，但在下行山當日藍天白雲微風輕吹，能享受久違的陽光與綠草，單走這一段已經值回票價。
不過途中已見工程船處處，在下唔知有咩大計劃，不過有機會遲啲呢度個海會被消失……
大直路行大概半小時就到了通往白芒的行人隧道，穿過隧道就正式進入東梅古道了。
一出隧道就見到黑底血書，三鄕村民的悲鳴，有誰聽到？有誰會聽？
不遠就看到一個小灣，有幾艘小艇，本來景色不俗，但當見到小艇對着的是一條一條龐大無比的天橋，甚麼景色都破壞淨盡。
再往前走，不久會見到一個廢棄了的小型焚化爐。這個焚化爐是屬於白芒村的，雖然細小，卻也罕見。原來白芒村雖小，卻有傳是唐朝名將郭子儀的後代，怪不得村口的石頭都叫試劍石咁霸氣。
經過白芒村向前走，就看到牛牯塱村。這兒一片祥和寧靜，連在路上跑來跑去的唐狗也怡然自得，可惜，走到一度鐵閘前，又是看到：「百年老村，慘被政府吞沒！」等句語。不禁擔心，這片遠離繁囂的樂土還剩下多少時光？
過了牛牯塱村就是上山的路段，坡度不大，而且全程鋪上石屎，就是小朋友也行得輕鬆自如。
停停走走，由白芒開始上山大概一個小時後就到逹此古道最高點的涼亭。不過如果iphone的顯示正確，最高點也不過200米高，實在小丘一個。
此後一直是往下的路，很快已經看到銀礦灣的建築了。
正當在下發現此道好像沒有叫人眼前一亮的景點時，忽然見到中途的小涼亭旁有一小片芒草地，即刻打個卡先！
繼續下山路，又遇上了銀礦灣的起源：銀礦洞。現在礦洞已封，重開無期，但其實內裏地形複雜，有很好的旅遊及教育價值。（當然呢啲喺某啲人眼中係無價值啦）
詳情可參考：https://bit.ly/2PMzU2b
剛離開銀礦洞不久，就聽聽隆隆的流水聲，原來不遠處正是銀礦灣瀑布公園。不過可能景點已曝光，該處又係旺過旺角。
離開瀑布，很快就進入通往梅窩碼頭的路。有趣的是沿道看到很多有趣的小屋、以至路邊的裝飾也滿有心思。
感想
如果想輕鬆行山，最好由東涌出發，因上山路段輕平穩易走，若由梅窩上以石級居多，體力消耗較大。
這條古道好像乏善足鋪上社交媒體的打卡位，但走着走着，突然會遇上一小片芒草地、深山中有兩條小型瀑布⋯⋯轉角遇到的未必經天動地，卻是足夠讓人回味的小幸運。
長度
10公里
需時
4小時（慢行連拍照5小時）
難度
2星（1星最易，5星最難）
起點交通
地鐵東涌站
終點交通
乘船回中環
乘3M巴士回東涌市中心
其他香港行山路線
分類：長途旅程（3小時以上）, 行山/郊遊, 香港
