最近邊度最多人？當然唔係旺角啦！除咗超市同Donki之外，有紅葉既地方相信就係最多人既地方喇。不過一啲熱門既紅葉景點如元朗楓香林或流水響都山長水又遠，想輕輕鬆鬆打下卡有無啲好方法？當然有啦，10分鐘可以由地鐵站行到去打卡，係唔係最實惠既呃like之選呢？

老編講緊既就係青衣公園喇。其實喺青衣地鐵去青衣公園，網上有人話B出口，有人話C出口。其實兩個出口都得，不過老編就覺得B舒服啲，而且亦都係官方路線。

地鐵站內有大大隻字指示，但一入咗青衣城就無指示架喇。

一路直行，3分鐘左右會到一個分叉位，轉右繼續行。

雖然好似兜返回頭路，但其實唔係，只要堅持繼續行落去，就會見到出路！

見到天橋，過馬路行落去就係喇！係唔係好快到呢？

基本上行到大閘已經見到紅色樹，問都唔駛問。

其實青衣公園最出名呢段「紅葉林」笨唔係楓香林嘅楓葉，而係名為落羽松既杉樹，所以如果真係抱住「好似去咗加拿大睇紅葉」咁既心情過嚟，就會有啲落差。欣賞紅葉如果為咗佢似「日本紅葉」或「加拿大紅葉」會唔會幾無謂呢？畢竟，呢度係香港呀～

而且近睇，落羽松有另一種美態架！

除咗呢個水池，青衣公園仲有兩個小水池，都好呃likable。

如果真係好想睇紅楓葉，就唔好堆喺池邊，行多兩步，走上小丘，嗰度有幾株楓葉，又有另一種風情架。

青衣公園

需時

1小時

難度

0星（1星最易，5星最難）

交通

青衣地鐵站B出口步行10分鐘

感想

以方便程度，青衣公園是觀紅葉的首選。但卻由於太近市區，在拍攝時往往有屋邨為照片加料，每一刻都在提醒你這兒是市中心，別以為去了外國。不過，如何在縫隙中尋找美好，相信已經成為香港人的「新常態」。願你也能享受這小小的樂趣！亦希望有關當局可以考慮把相同品種的樹木聚在一起種植（首推白色或粉紅色的宮粉羊蹄甲），簡單又能搏大眾歡心⋯⋯香港人其實好易tum的。

分類：行山/郊遊, 香港, 快閃放空（1小時來回）