潮流興行山,翻開社交媒體,行山路線越來越刁鑽,難度隱秘道缺一不可。不過今次老編就反其道而行,介紹一條元祖級的行山路線:龍脊。做得元祖級,當然有佢威水史。龍脊早喺2004年已經被《時代周刊》(亞洲版)評選為「亞洲最佳市區遠足徑」之一,而Lonely Planet 更指龍脊係「全球最佳遠足徑」之一!而最重要喺,龍脊絕對唔難行,需時也不多!唔講咁多,出發!

前往龍脊方法

首先喺筲箕灣再轉9號巴士或者小巴,在土地灣站下車。可以喺度睇吓地圖同去埋一次廁所,中途無得去架喇~

基本上得一條路,跟住人行就OK了。

上山不久,就會經過小小竹林,都幾清幽。

行咗5分鐘,就可以見到一大片叢林,好爽呀!

山路有好多大大細細既石頭,易行得嚟又有少少行山feel~

唔駛10分鐘,就見到紅山半島喇!

沿路有好多指示牌,唔駛驚迷路。老編行咁多次山都未見過一條行山徑有咁多指示牌。

途中都有分叉路,但完全唔需要擔心行錯。去到呢個路口轉右就啱喇。

落車行不到半小時,就到了景觀較開揚的山脊位置,已經可以望見石澳村、石澳正灘與石澳高爾夫球會。

龍脊得名就係因為其山巒高低起伏,遠看如有飛龍騰雲之氣勢。

沿山脊起伏前行,途中可俯瞰石澳和大浪灣的全景及遠眺清水灣半島。

中途都有啲山路要上,但鋪砌得好好,每級都不高,可以輕輕鬆鬆拾級而上。

被三百六十度的優美景色包圍,兩邊都係無敵海景。

去到打爛埕頂山呢個牌,就係最後打卡位,跟住就開始落山了。

落山途中,沿路都係森林山路,景觀唔多,老編都無影相了。

石澳道,乘坐從石澳開出的新巴巴士路線9號前往市區。

感想

龍脊可以話係入門級既行山徑,只需半小時就可以上到瞭望點,容易上但又可以看到咁有氣勢的山勢,真係好抵行!果然名不虛傳,所以呢條山徑幾時都旺過旺角!

而且基本上就算唔識睇地圖都唔會落錯車,因為實在超多人落。但無論幾易行都好,自己都要做足功課,因為你唔知自己幾時會誤入歧途或突然無人去,到時你跟邊個?

龍脊

需時

1.5小時(慢行連拍照2小時)

難度

1.5星(1星最易,5星最難)

起點交通

  1. 筲箕灣乘9號巴土
  2. 筲箕灣乘小巴

其他行山路徑

tungo

【細味‧港地】從屯門走到元朗,看港版千島湖—沒有唾手可得的幸福

yuen tsuen2

【細味‧港地】元荃古道—從元朗到荃灣,路隨人茫茫

lowersm-1

【細味‧港地】下城門水塘—換過角度走上山林道