潮流興行山, 翻開社交媒體, 行山路線越來越刁鑽, 難度隱秘道缺一不可。 不過今次老編就反其道而行, 介紹一條元祖級的行山路線: 龍脊 。做得元祖級, 當然有佢威水史。 龍脊早喺2004年已經被《 時代周刊 》( 亞洲版 )評選為「亞洲最佳市區遠足徑」之一, 而 Lonely Planet 更指龍脊係「 全球最佳遠足徑 」之一! 而最重要喺, 龍脊絕對唔難行, 需時也不多! 唔講咁多, 出發!

前往 龍脊 方法

首先喺筲箕灣再轉 9 號巴士或者小巴, 在土地灣站下車。 可以喺度睇吓地圖同去埋一次廁所, 中途無得去架喇~

基本上得一條路,跟住人行就OK了。

上山不久, 就會經過小小竹林, 都幾清幽。

行咗 5 分鐘, 就可以見到一大片叢林, 好爽呀!

山路有好多大大細細既石頭, 易行得嚟又有少少行山 feel ~

唔駛 10 分鐘, 就見到紅山半島喇!

沿路有好多指示牌, 唔駛驚迷路。 老編行咁多次山都未見過一條行山徑有咁多指示牌。

途中都有分叉路, 但完全唔需要擔心行錯。 去到呢個路口轉右就啱喇。

落車行不到半小時, 就到了景觀較開揚的山脊位置, 已經可以望見石澳村、 石澳正灘與石澳高爾夫球會。

龍脊得名就係因為其山巒高低起伏, 遠看如有飛龍騰雲之氣勢。

沿山脊起伏前行, 途中可俯瞰石澳和大浪灣的全景及遠眺清水灣半島。

龍脊
龍脊

中途都有啲山路要上, 但鋪砌得好好, 每級都不高, 可以輕輕鬆鬆拾級而上。

龍脊

被三百六十度的優美景色包圍, 兩邊都係無敵海景。

龍脊

去到打爛埕頂山呢個牌, 就係最後打卡位, 跟住就開始落山了。

打爛埕頂山

落山途中, 沿路都係森林山路, 景觀唔多, 老編都無影相了。

石澳道, 乘坐從石澳開出的新巴巴士路線 9 號前往市區。

感想

龍脊可以話係入門級既行山徑, 只需半小時就可以上到瞭望點, 容易上但又可以看到咁有氣勢的山勢, 真係好抵行! 果然名不虛傳, 所以呢條山徑幾時都旺過旺角!

而且基本上就算唔識睇地圖都唔會落錯車, 因為實在超多人落。 但無論幾易行都好, 自己都要做足功課,因為你唔知自己幾時會誤入歧途或突然無人去, 到時你跟邊個?

龍脊

需時

1.5 小時( 慢行連拍照 2 小時)

難度

1.5 星( 1 星最易 , 5 星最難 )

起點交通

  1. 筲箕灣乘 9 號巴土
  2. 筲箕灣乘小巴

參考資料:

人氣登山步道:龍脊
https://www.discoverhongkong.com/tc/explore/great-outdoor/dragons-back.html

其他行山路徑

【細味‧港地】從屯門走到元朗,看港版千島湖—沒有唾手可得的幸福

【細味‧港地】元荃古道—從元朗到荃灣,路隨人茫茫

【細味‧港地】下城門水塘—換過角度走上山林道