Site icon 細味香港

【 細味 ‧ 東澳古道 】東涌到大澳 ,入門級難度山徑

秋冬季節又係行山的好時候, 但係太多的上上落落既山路對新手或有膝關節痛的朋友始終係一個考驗。 想悠悠閒閒嚟一次遠足郊遊, 由東涌走到大澳的 東澳古道 係一個不錯的選擇。 因為 東澳古道 路程雖長, 但起伏不算大, 而且有一半路程是石屎路, 難度較低。 由於幾乎全線是沿海邊行走, 風景開揚, 可遠望港珠澳大橋, 甚至可以邊行邊看日落 ! 由東涌出發, 慢慢行連影相大概五個鐘就可以去到大澳。 不過如果想喺大澳食吓嘢行吓街, 就要提早出發喇!

東澳古道 – 東涌出發路線:

由東涌出發不止一條古道, 除了東澳還有東梅( 即東涌至梅窩 )查實東涌唔係近年先發展, 佢既歷史仲耐過九龍城寨, 喺南宋初年就已經有。 因為當時大嶼山有人販賣私鹽返廣州, 朝廷就派咗 300 名軍兵駐守喺東涌, 仲起咗個城寨嚟守衛, 就係東涌古城了。 不過現存在東涌的炮台就沒有這麼長的歷史,只是在清朝興建。

但係今次在下介紹的路係唔會去睇炮台呀、 古城之類的, 想去呢啲地方可以參考其他網頁。

好講返點行先……( 咁耐至入正題 =.= )

到東涌基本上就是搭地鐵或巴士, 如果搭地鐵, 就係東涌站 A 出口, 再去東涌消防局。

【細味‧東涌】伯公坳到大東山 — 嘆日落芒草美景
【細味‧梅窩】東梅古道 — 從東涌到梅窩 , 捉緊當下每個微細的小確幸

如果搭車, 就喺東涌消防局站落。 消防局旁邊係警察總部( 兩幢樓基本上並排 ), 喺警察總部轉右行入裕東路直行。

見第一條天橋行上去, 再直行。

見到第二條天橋就唔好上, 行多兩步就有條分叉路, 走右手邊貼水而行就啱喇。

沿途見到有啲居民垂釣, 又有一啲供奉各式神明的擺設, 很有生活味道。

有時我地會以為垂釣、 務農、 供奉山神…… 呢啲係上一代人才做的事, 其實在一些人來說, 仍是他們的生活日常。 未必是懂期權、 懂股票、 懂紅酒才是懂生活。

一路跟指示牌行, 就會經過侯王廟、 東涌戶外康樂中心, 跟住就會到達侯王橋。

侯王橋歷史

呢條侯王橋睇落平平無奇, 但原來來頭都不小。 據說原本居民只以竹興建這條橋, 當然好容易散啦。 於是東涌鄉事委員會就極力爭取由政府協助修橋喇。 到咗 1971 年, 離島理民府就派咗個 AO 落去睇吓,呢位 AO 呢, 就係曾蔭權喇。 煲呔睇完之後返去回報, 結果離島理民府同意建橋, 並負擔購買建材的費用, 同時聯終駐港英軍協助, 終於喺 1971 年 2 月由駐港英軍以義務性質興建咗條鐵橋, 並立咗塊碑嚟紀念呢件事。 不過條橋喺 8 年後就爛哂, 又要居民向政府申請過撥款, 今次用咗石屎嚟起, 用咗 40 都仍然好穩固。 雖然同樣有塊碑紀念件事, 不過無咁當眼同埋甩哂色了~

最右小屋前的啡色物體便是一堆一堆斬得整齊的柴枝。

經過侯王橋見到山下一間小屋, 屋前放了一堆柴枝, 換言之這家人也許還在燒柴生火, 很有遺世獨居的味道。 想起衛斯理小說中一個故事: 一班人為了逃避電腦的監控, 寧願逃到深山, 不用任何自來水、 電、 甚至不用任何工廠生產出來的物品…… 為的是怕一天電腦反過來控制人類! 不知屋主對這故事又有甚麼感覺? 還是屋主只是純粹想保留燒柴的傳統?

【細味‧荃灣】 元荃古道—從荃灣到深井 , 尋找陶淵明的悠然南山

繼續向前行, 基本上一直都有路牌指引, 所以不用擔心會走錯路。

行了大概一個小時, 就會到達䃟頭村, 有士多和洗手間, 走得累了可以在這兒稍事休息。

繼續向前行, 又來到分叉路了。 指示牌一邊往沙螺灣, 另一邊到碼頭。 記着要走往沙螺灣一邊。

沿著小路走, 不久就到達沙螺灣村。 近年因為村民有心經營, 也有一些值得一看的景點, 例如巨型的雕塑「千里眼」, 詳細可參看: 《行東澳古道,看沙螺灣雕塑》 一文。

過了沙螺灣村不久, 就來到三山國王廟。 又三山又國王, 中國唔係自古只有一國? 原來所謂的國王唔係人, 而係山神, 分別係巾山、 明山和獨山的山神。 傳說這三位山神幫助宋太宗打勝仗, 被朝廷封為「國王」…… 封一個山神為國王, 究竟係表揚定貶低呢? 在下真係睇唔透。

離開三山國王廟大概再行半個小時, 就到達深屈灣了。 這兒有個小碼頭, 是休息及打卡的好地方。 其實美景並不一定需要芒草紅葉櫻花初雪, 有當然錦上添花, 但有時一抹斜陽、 一個小碼頭, 已是讓人留連忘返的好地方。

深屈村是到大澳前最後一個補給點, 有數間士多在海邊。 小編許多時候都會在此吃碗豆花或綠豆沙, 聽聽海浪休息一下, 相當舒服寫意!

過了深屈村的士多後, 會看到一片類似蘆葦草田, 不算很大片, 但景色也很優美。

整條東澳古道沒有太多分叉路, 而且指示頗清𥇦。 但有一次老編自持行過數遍, 只顧著傾談而沒留意路牌, 結果無厘頭地上了山。 雖說山上風景頗美, 但最終還是要原路折返, 浪費了一些時間。 所以行山任何時候都要留意路徑。

在深屈村後記著要轉右進入山徑, 別上山呀!

在深屈村之前的山徑雖說是古道, 但鋪砌整齊, 十分好行。 過了深屈後就漸漸變成真正的山路, 不時有大小沙石, 甚有古道之風。

其實整條東涌古道都是沿着海岸線行, 所以起步不久就可以看到機場飛機升降, 繼而一直伴你走的不是蝴蝶蜜蜂, 而是那條偉大的港珠澳大橋。 樂觀的人或會看到偉大的工程, 可惜在下看到的卻是劃地為牢:從前香港人的視野是面向全世界, 並提的是紐約倫敦, 今天香港好像被困在橋內, 成為中國沿海一個小城市。

雖然不是芒草季節, 但沿途偶然也會看到一些類似芒草的物體。

老編未能早睡早起, 所以每次行東澳都是 1 至 2 點才起行, 走到尾段往往就是日落時。 在這兒看日落景色也很不錯!

繼續向前行, 來到一個警告牌前。 正路是向左走上路, 可看到嶼北界碑以及俯瞰大澳漁村。 不過當時天色已晚, 加上前面有一對山友開路, 便撥開長及腰的野草前行, 幸而不到二十分鐘已看到達大澳的楊侯古廟, 趕得及在天黑前到達大澳。

至於大澳, 就留待以後介紹吧!

東澳古道

長度
15公里

需時
4.5 小時( 慢行連拍照 5 小時 )

難度
2.5 星( 1 星最易, 5 星最難 )

東澳古道是一條很平坦的古道, 沒有太大的高低起伏。 想像古人可能要揹着貨物進出, 能選擇當然要選平一點的道路, 所以十分好走。 只是路徑較長, 需要的體力也較多, 所以雖然易行, 出發前也要衡量能否應付。 最好提早出發, 可以在補給點逼留長較長時間回氣。 資料指沙螺灣碼頭有渡輪前往屯門、 東涌或大澳, 如途中真的想退出, 也可選擇。

起點交通

1. 地鐵東涌站
2. E21A 或 E31 巴士都可到達東涌

終點交通

1. 11 號巴士出東涌
2. 1 號巴士到梅窩
3. 大澳碼頭乘坐渡輪往屯門, 注意往屯門的尾班船為 6 點。

按此瀏覽更多三小時以上的長途行山路徑

參考資料:

【 #香港唯一古城 : 近 800 年歷史的東涌古城 】
https://hong-kong-heritage.com/tungchungfort1/

其他香港行山路線

【東梅古道】— 捉緊當下每個微細的小確

Exit mobile version