今時今日的山頂公園是一個有著維多利亞色彩的公園，相信許多人都知道從前香港總督亦在這兒建有避暑別墅，名為 香港總督山頂別墅 （Mountain Lodge）。點解港督要山長水遠在這兒起別墅？ 貪這兒風涼水冷嗎？ 慢慢話你知啦。
興建 香港總督山頂別墅 原因
唔係講笑， 港督挑選山頂起別墅真係貪呢度風涼水冷。
一百多年前的香港雖然沒有溫室效應， 但對來自英國的總督來說， 亞熱帶的香港都是悶熱難耐的， 特別是在夏天。（ 其實小編都好認同！ ）
由於山頂比中環的溫度相差有成攝氏 8 度， 所以被選為避暑之地。 其實原本港督舊山頂別墅塊地喺 1862 年時係起咗間英軍療養院， 但不久遭棄置。 於是在 1867 年，總督麥當奴 ( Richard Graves MacDonnell ) 從軍部購入該建築物並改建作別墅。
別墅最初以木建造， 但係大家都知道香港既颱風有幾利害， 在山頂如此當風的位置用木建造， 一個夏季之後， 別墅就被風催殘了。 於是在第二年的春天， 阿麥當奴總督問政府攞咗大拿拿 9,000元 去重建咗一座有三間房的小樓。 可惜到咗 1874 年， 間別墅又被颱風吹走了屋頂， 最慘係當時既總督堅尼地（ Arthur Kennedy ）同賓客當晚都在場， 唔係堅離地係堅離天花， 諗落都幾驚！ 別墅最終於 1897 年拆卸。
香港總督山頂別墅 的建築特色
但係由於總督們實在太喜歡山頂， 雖然又有颱風吹又有白蟻侵蝕， 依然想住喺山頂。 1900 年總督卜力（ Sir Henry Arthur Blake ）又以高達 97,000 元搵咗巴馬丹拿（ Palmer & Turner ）（ 前稱公和洋行 ）建築師設計， 生利建築承建， 起咗一間有蘇格蘭風格的別墅。 呢間別墅同之前差得遠了， 不單有各式房間，兩側仲有錐形屋頂角樓， 加埋前後花園同網球場， 唔怪之得當時亦被形容為「 山頂最宏偉最美觀的建築物 」。
唔好以為呢個稱譽好易攞， 從前住得山頂嘅人非富則貴（ 雖則而家都係⋯ ），不過似乎以前嘅人品味都幾高吓。 都係嗰句， 如果保存到今日， 真係主題樂園都唔駛起⋯
據The Oval Partnership在2011年的研究（奇怪點解唔搵返 P&T 做研究），這幢別墅揉合蘇格蘭元素和新古典風格元素，創造出堅實的設計。另一特色是在維多利亞時代建築加上遊廊（Verandah) 來適應亞熱帶氣候。遊廊是一種常見於印度和英國遠東殖民地的建築特色，在香港較著名的有淺水灣酒店，甚至在高街前精神病院都可以看到這種建築特色。另一方面，守衛室的結構同樣樸實，展示出一種偏向蘇格蘭式多於英格蘭式的堅實風格。
不過唔係個個總督都鍾意上山避暑，有啲總督會嫌山頂又潮濕又多霧。所以當1934年粉嶺的別墅建成之後，山頂呢間變咗舊愛，於是雖然山頂喺1888年有咗纜車，但好似比以前仲「交通不便」，加上日治時期別墅受到戰火損毀，修葺費用又貴，終於在1946年整幢被清拆，只剩下別墅原有的守衛室及基石。
拆卸後的變化
別墅拆卸後，政府將別墅改建成山頂公園，於1950年正式啟用，更在1979年時於別墅遺址上加建涼亭，獅子會則送出兩對石獅子放在涼亭前後。
2006年，建築署發掘出前總督山頂別墅的部分遺跡，轉交古物古蹟辦事處進行考古發掘。發掘過程中最大的發現是在門廊上找到一幅圖案地磚，約1公尺乘3.5公尺，以英國明頓·霍林斯（Minton Hollins）公司生產的15款地磚拼砌而成。此外，古蹟辦亦發現8塊於1910年豎立、刻有「 Governor’s Residence」的界石、兩塊軍部的界石、一處曾經用作水務工程平房的頹垣及4個建築構件的棄置點。
本來經過多年研究，有關部門本計劃復修山頂別墅地基遺跡，以重現當年的布局作展覽。但後來有人提出70年代的涼亭是一些人的「集體回憶」，結果計劃胎死腹中。雖然無法重現舊山頂別墅的遺跡，但山頂花園以至柯士甸遊樂場的設施在 2011年復修時均以維多利亞時代的風格設計，令山頂休憩空間更具歐陸味道，現在成為不少人喜愛打卡、拍攝婚紗照與畢業照的地方。
沒有恆久不變的勝負
舞榭歌臺，風流總被，雨打風吹去。再漂亮再宏偉的都會消散，特別是在變幻原是永恆的香港，從來沒有甚麼是千載不變的。所以今天就算看似贏盡所有，也別太趾高氣揚，始終世上多的是你方唱罷我登場，哪有甚麼永恆不朽？亂烘烘，也許不過是為他人作嫁衣裳。同樣地，就算身處低谷，甚或除了會痛一切都美好時，記著路的盡頭總有未盡處，聚集念力凡人亦可以飛，如何破夢，自有分曉。
部份圖片取自網上，如有侵權煩請告知。
繼續睇山頂
山頂公園 — 歐陸風格花園涼亭，畢業相、結婚相熱門地
參考資料
The Governor’s Getaway
http://hkcitylife.com/index.php?route=product/product&path=105_267_268&product_id=1162
前總督山頂別墅遺址和周邊地區文物詮釋研究 – 歐華爾顧問https://www.amo.gov.hk/form/executive_summary_c.pdf
尋找山頂傳奇（下）
https://www.etnet.com.hk/mobile/tc/diva/art/raymondfung/29764
舊總督山頂別墅 2007 年考古調查簡報https://www.aab.gov.hk/form/AAB_Paper133_mountain_lodge_annexb_c.pdf
山頂掘到寶 百年港督別墅遺蹟出土
http://the-sun.on.cc/channels/news/20070111/20070111022243_0000.html
舊總督山頂別墅 地界及界石分佈圖
https://www.historicalwalkhk.com/governorsresidence/
百年港督別墅出土無期 （原文刊登在蘋果日報）
https://nomad.666forum.com/t147-topic
尋找山頂傳奇(上)
http://202.62.215.15/www/tc/diva/art/raymondfung/29617
Mountain Lodge – Wikipedia
https://en.wikipedia.org/wiki/Mountain_Lodge
香港人
寫得好好⋯加油