由布院 – 日本OL至愛溫泉

日本浸溫泉的地方與便利店一樣，總有一處在左近。無論你著重的是風景還是功效，都有大量選擇。所以日本人自己都成日做調查，睇吓邊啲地方既溫泉至正、至受歡迎。而其中一調查就係日本OL至愛溫泉，勝出既就係由布院。

由布院又叫湯布院，由於日文發音都是「ユフイン（YUFUIN）」，所以兩個名稱都有人用。好多人都聽過別府溫泉，因為嗰度既溫泉量係日本第一。咁大既盛名，當然人人都湧住去啦。咁由布院可以靠咩嚟吸引人呢？

答案就係靠裝潢精致浪漫的咖啡店，甜品舖和林林種種的雜物小店喇！就係咁簡單？不，要做到咁一啲都唔簡單。反而係由布院既觀光業者經過歐洲的旅遊考察，覺得要同夜夜笙歌、數量第一去比就係無得比，不如就認認真真去建造一個專攻女性的溫泉地。

減少車流

首先，他們刻意不建造寬濶的馬路，鼓勵遊人乘搭鐵路，減少往來的汽車。由布院位於九州的大分縣，從褔岡可以乘專用列車「由布院之森」前往，車廂有點懷舊，行駛得也有點慢，也許就是讓人放鬆心情，迎接一個悠閒的溫泉假期。

由布院之森以復古的綠色車身，加木質地板的內部裝潢，真係未出發先興奮

由布院的火車站感覺與舊式車站不同，一查資料原來是由磯崎新所設計。而車站旁在2018年開幕的遊客中心則是由坂茂所設計，名師出手果然非同凡響。

邊度都見到由布岳

由布院有咁多溫泉既原因係因為有活火山由布岳，所以要喺由布院開商舖又好、溫泉旅館又好，在建築時一定要考慮當地景觀…唔單止你間屋望出去既景觀，仲要人哋睇你既景觀。因為起好咗，間建築物就會成為當地風景既一部份。當地亦有規定，建築物不能高過十公尺，所以喺好多地方都可以輕易見到由布岳。

老編就諗如果香港都可以有若干規定，例如臨海不得起屏風樓、不可高過太平山或阻擋獅子山，咁香港既風景線一定更靚…當然有人會話我阻人搵食&發達啦～～

正對著車站的便是由布岳，如果在春天與冬天到，還可以看到山上鋪了雪，有點富士山的味道。

由布院大大小小的溫泉旅館都是小巧精緻的建築，感覺格外悠閒。

每一步都是小確幸

接下來，由布院不允許色情行業，反而歡迎各式自家創作。對於文青系以及女性，當然有著大大的吸引力！

從火車站走大概十多分鐘，便到達湯之坪。這條小小的街道左右均是矮小的舊屋，卻各有主題，從宮崎駿精品、蜜糖專門店、筷子專門店、寵物用品店、菓子店、茶屋…琳琅滿目，比起千篇一律的商場連鎖店，這裡每間舖頭都讓人感到了專注與趣味。

除了特色小店，街上還有不少設計精緻的小café，走得累了喝口咖啡吃件蛋糕，每一步都是小確幸。真的，每間店都想走進去逛逛！

附加景點：金鱗湖

除了shopping，由布院都有一個傳統的觀光點，金鱗湖。由於湖的西邊湧出溫泉而東邊湧出的卻是清水，形成了溫冷各站一半的湖，不同時刻都有不同美景。但老編當日因天雨沒有親臨其景，唯有借用一下朋友的照片。同樣地，都是以hea為主題，美景其次！

交通

1. 從福岡乘由布院之森，但需提早預約。（由於每天由有三班，又受歡迎，因此經常會有連日本人都預約不到的情況出現。）
2. 特急由布，由博多出發直達由布院。
3. 於博多乘坐特急音速，於大分站轉乘久大本線普通列車或特急由布院之森或特急由布。需轉1次車，全程約3小時30分。
4. 於博多乘坐往熊本方向的新幹線，於久留米站轉乘久大本線普通列車或特急由布院之森或特急由布。需轉1次車，全程約3小時。