行山/郊遊, 輕鬆行山(3小時以內)

慈沙古道 — 在市區行古道

多得疫情,否則老編從來都無留意香港原來有咁多古道,又東澳又東梅又元荃……老老豆豆,乜由一個地點去另一個地點唔係自古以來係搭車架咩?行?唔係講笑吓麻。

但喺呢個行山當旅行兼健身的世代,呢啲塵封咗幾廿年既古道再次被人掘返出嚟行。不過好多時呢啲古道都要行三五七個鐘,無大半日都唔駛旨意行完。但呢條由慈雲山通往沙田既古道又幾低消費喎,慢慢行都係兩個零鐘,起點終點都算旺區,行完仲可以食返餐好既,都係一個假日既好節目。

慈沙古道路線

慈沙古道係連接慈雲山到沙田的古道,所以兩個起點都算多嘢食。今次老編由沙田出發,逆走慈沙古道。這次路程起落差不多三百米,而由沙田出發可以緩緩上斜,很適合超hea的老編。

起點是沙田圍站,本身D出口會直接啲。不過老編選擇咗C出口,因為對面係沙角邨街市,有一啲食肆,可以醫完肚至出發。

醫完肚,可以沿著沙角街走,轉入水泉坳街。

沿著水泉坳街上山,看著山上的水泉澳邨前進。

轉了彎,第二個街口走進去。

這部份仍是石屎路,十分平坦好行。

石屎路盡頭會見到馬鞍山郊野公園,老編不知慈沙古道是否這裡才開始計算,不過在此就開始是一連串的石路。

地面鋪著整齊的石塊,梯級也很矮,很好行。

這條古道很大部份都是沿著溪旁走的,常常聽到流水聲。

慈沙古道

從地鐵站出發,大概走了一個小時後,便可以回望沙田。天氣好加上眼力好的時候,可以看到對面道風山的十字架!

慈沙古道

不久便到達一條石橋,橋下是慈沙石澗其中一段。

慈沙古道

橋的另一邊則是燒烤場。照片出賣了拍攝時間是在疫情前,疫情後這兒的紅繩應該纏了又拆,拆了又纏⋯⋯

就算不(能)燒烤,也可以在亭內稍事休息。

休息過後繼續向沙田坳進發。

慈沙古道

石頭路終於接駁上石屎路。

石屎路是衛奕信徑5段,向左轉,走到尾便是士多與獅子亭。

慈沙古道

見到有士多,老編又想想當年。話說從前老編去郊遊,總是看到很多「山水豆腐花」的小士多,但這些士多好像消失了許多,除了是十分出名的地點。不過雖然很久沒吃山水豆花,但因為士多內很多人,老編沒幫襯。

很快就走到這座獅子亭。其實老編初時見到個亭咁新淨對佢無乜好感,返到屋企搵資料至知,原來個亭可以話keep得幾好!不過老編還是喜歡沒那麼多題字的版本。而獅子亭下的九龍東,真的有了翻天覆地的改變了。

欣賞完獅子亭就可以沿沙田坳道走下去慈雲山。

慈沙古道

沿途可以眺望一下九龍現在的景色。

經過慈雲山的法藏寺,繼續下山便可以到慈雲山或黃大仙。這段沙田坳道都頗長,而且越到末段都頗斜。老編記得有次由從黃大仙走上山,覺得幾辛苦,幸好這次選擇了從沙田逆走古道,輕輕鬆鬆上山。

不過沙田坳道都幾長又曬,如果唔怕落樓梯又想快啲落山,可以喺獅子亭過小小條樓梯落去,經過慈雲山觀音廟,直落慈雲山。

慈沙古道

長度:5.3公里(由沙田圍站走至黃大仙站)
高度:約300米
需時:約2小時

感想

記得曾經見過一張香港古地圖,指九龍塘以北皆是「山岡不毛之地」。如果計要發展,香港實在不是甚麼好地方,周圍都係山嶺,就算現在發展了,很多高山還是在城市之內。但正是山嶺與城市如此緊密,造就了香港獨有的景緻。就如經歷許多的難關,才造就今天香港。也許今天不如往年明亮,相信終有一天終可再次閃耀。

更多行山路線:
南生圍—元朗站二十分鐘走到香港後花園
東澳古道—東涌到大澳 ,入門級難度山徑
元荃古道 — 從荃灣到深井,尋找陶淵明的悠然南山

Leave a Reply

Your email address will not be published. Required fields are marked *