元荃古道 係一條熱門的行山路徑， 究竟有咩特別呢？ 元荃古道 是昔日往返元朗與荃灣的一條路徑。 百多年以前無巴士無地鐵， 元朗的農民要把農產品帶出荃灣市集擺賣甚至賣到外地， 就一定要攀山越嶺， 所走的就是 元荃古道。 我哋今次由荃灣出發，逆走半段 元荃古道，到深井落山嘆燒鵝，唔講咁多，出發！
元荃古道起源
正所謂個個都行山， 唔通個個都想行山咩？ 呢句說話今時今日未必適用， 話哂無人拎支槍指住你個頭， 一定要你行山。（ 做兵陪娘娘嗰啲係心甘情願 ）但係古人無得揀， 要由一個地方去另一個地方， 特別係攀山越嶺既， 唔用對腳行， 又真係無其他方法。 如此行下行下， 便在香港山脈中行出幾條古道來。
荃灣本稱淺灣， 因此灣水淺而圓闊。 相傳南宋末年， 宋室君臣為避元兵而逃至今日新界時， 曾路經淺灣。 後來一些居民認為「淺」不吉利， （ 龍游淺水遭蝦戲 ） 遂改稱全灣。 後來有楊屋村秀才改 「全」為 「荃」， 自此，淺灣改稱荃灣至今。 而元朗最先是寫作圓蓢， 然後變成元塱， 再變成今日的寫法。
元荃古道接駁荃灣的柴灣角及元朗大棠南坑排村， 全長約 13.5 公里。 因為興建大欖涌水塘， 部分古道被開闢成車路， 加上份屬荃灣區的部份步道鋪設成水泥路， 古道舊貌已不復見。
荃灣港安醫院起步
古道的起點是荃灣的荃景圍， 在港安醫院對面。要到港安醫院，可以乘30或30X九巴或乘地鐵到荃灣站，轉95M綠色小巴，在荃灣港安醫院站落車，向前走數步便見到有條上山的樓梯。
一開始先走一段 300 米長的石級到達引水道， 這兒有路牌指示為下花山（ 南 ）。
從下花山再上走 1 公里多的斜道， 沿途有一些小菜圃， 有人世外高人仍過着農耕的生活。 其中一個園圃更掛上各式毛公仔來嚇退偷吃蔬菜的雀鳥， 成為了有趣的景點。
走了大約一小時便到了一大片開揚的山崗， 沿路只有一些灌木及草地， 視野遼闊。 斜度也減低了， 回頭一看， 荃灣 一帶景色盡收眼底， 實是心曠神怡。
繼續往前走不到半小時便會到達石龍拱。 由港安醫院 至石龍拱長約 2.2 公里， 高度卻由 49 米升至約 400 米， 所以是整條古道中最吃力的一部份。
古道部份路途已鋪上雲石， 不但感點上有點古怪， 下雨時路更濕滑， 要多加小心。
昔日在石龍拱可眺望青馬大橋一帶的景緻， 但由於空氣污染日漸嚴重， 香港出現「煙霞」的日子比往日更頻密， 縱使在晴天也未必能看到遠方景色。
過了石龍拱， 路段大多屬下山斜路， 這兒沒有新鋪的雲石路面， 反而有點古道意思。
繼續下山開始聽到山徑旁有水聲， 有些山友指這條稱為田清河。
繼續前行會有一個交匯處， 山友可選擇向前往田夫仔再到元朗， 或轉入 清快塘 落深井。
往清快塘的路徑旁種了幾株楓葉， 雖比不上大棠的 楓香林 ， 但紅綠相輝映也算美景。
清快塘 原是一條村落， 始建於乾隆年間， 原是來自福建的傅姓客家人， 現大部份人已遷往深井或市區居住。 不過在千禧年初其中一對夫婦想返回祖屋居住與家人一起在此興建「 喜香農莊 」。
農莊內有數個荷塘， 稙有各種顏色的荷花， 更種有不同植物花卉。 這兒還為山友提供飲品、 小食及地圖等， 相當貼心。
看着小山下的孩子身影， 實在有陶淵明筆下的境象：
採菊東籬下 ， 悠然見南山。
山氣日夕佳 ， 飛鳥相與還。
此中有真意 ， 欲辨已忘言。
不過快樂既時間總係過得快， 在農莊稍作休息後便可以沿山徑落深井。 之前上了多少山就要落返咁多山， 下山的斜道不輕， 不過沿途可俯瞰青馬一帶， 一時也忘卻了腳下的酸軟。
元荃古道 —荃灣至深井段
長度
10 公里
需時
3 小時（ 慢行連拍照 5 小時 ）
難度
2星（ 1 星最易， 5 星最難）
起點交通
荃灣地鐵站往愉景新城方向走， 一直到荃德花園右轉上山至港安醫院
搭30、30M、30X到荃威花園， 下車後沿荃景圍到港安醫院
終點交通
九巴53、234A、234B
城巴962B
專線小巴96C、96M
感想
基本上元荃古道是一條很安全的郊遊徑， 只是上山時有一大段樓梯與斜坡， 需要較多體力。 但只要量力而為， 慢慢行， 無問題。上到石龍拱景色優美（ 可惜污染日盛 ）。不過石龍拱過後風景不多，需時較長， 如只想作輕鬆郊遊，可在石龍拱原路折返，或到清快塘落深井。
更多行山路線：
南生圍—雲與清風未必常擁有，珍惜還能擁有的
東澳古道—留住這時情
Leave a Reply