有些稱呼、有些名字，我是很不正確地寧願暴露年齡也不願更改，如叮噹、如地鐵、火車，也如 兵頭花園 。（話時話，老編已經老到一個唔驚暴露年齡的年齡了～）又老老實實吖，香港動植物公園這名稱真係沒趣到一個點，同滾水既無味有得揮～
講返小小歷史，兵頭花園係1860年開始興建，是全球歷史最悠久的動植物中心之一。點解會叫做兵頭花園呢？邊個兵頭咁巴閉可以有個咁大既公園呢？喺殖民地時代既香港，最大個兵頭咪港督囉。見過不少資料（包括維基）都話港督曾經喺1842-43年住過喺兵頭花園嗰度，但唔知點解老編唔係好信。或者因為第一任真正既港督係1843年至正名，之前既只係香港行政官啦。所以老編傾向相信因為砵甸乍與戴維斯曾在這個植物花園辦公，所以至叫做兵頭花園。（Anyway, 老編會再考古）
去 兵頭花園 路線
講返點去先。其實喺港島區有好多條路線都可以去到兵頭花園…附近，不過與其實係要行一段路，不如就教大家點樣喺中環用十分鐘行上去啦～
無論你搭地鐵又好、電車又好、天星小輪都好，嚟到匯豐總行先。
穿過匯豐底部，就見到長江中心花園個入口，行去左手邊有扶手電梯上。
上到平台，有兩條路，向前直行到尾轉右可以直上兵頭花園。亦可以喺最右邊樓梯上，經過聖約𨌺座堂至上去。老編揀咗直上先，落山至慢慢睇古蹟。
沿途既指示都好清晰，雖然條路比較窄同有少少斜，不過好快就會到。沿途仲會經過好多值得睇既建築，例如呢間梅夫人婦女會。
上山只有一條路，一直向上就可以了。
到咗上亞厘畢道，過馬路然後穿過隧道。但因為上亞厘畢道無紅綠燈，要小心睇車。
到亞厘畢道的天橋底，有幾個有趣的坐椅，如果行到索氣可以喺度唞唞，再上樓梯。
上完樓梯，就到兵頭花園喇，係咪好快呢？
門口呢四條石柱，就係花園內最古舊既構件之一，大概係1861-1864年已經竪立喺度。
穿過入口上一層樓梯，就會見到一個華人紀念牌坊。呢個紀念牌坊建於1928年，原本係紀念第一次世界大戰殉難的華人，但牌坊在第二次世界大戰期間曾遭損毀，戰後由香港政府修復以悼念在兩次世界大戰中為同盟國殉難的華人。牌坊前後各有一對石獅守護，最獨別既係全爲雄性。老編每次經過都會靜默一陣，向曾為保護香港而犧牲的人們致敬。
穿過紀念牌坊向前行幾步，右邊有條向上的樓梯，走上去就會到達噴水池。這個噴水池可以說是動植物公園的地標。百多年嚟兵頭花園重建過好多次，噴水池都換過，但位置就一直都無變過，可以話係見證住香港成長既一個地方。
喺呢個咁地靈人傑既地方，除咗英國人好鍾意之外，日本人都好鍾意。日治期間，公園唔單止被易名為「大正公園」，仲籌劃過建造神社。
每次老編嚟到呢度都覺得好神奇，放眼望去係香港最顯赫的地標：無論是權力的禮賓府還是財力的滙豐銀行、中國銀行、長江中心等。但任何人都可以在此放下俗務，享受陽光與空氣。
兵頭花園係依山而建，第一層最觸目當然就係個噴水池啦，但係喺噴水池既末端有一個小食亭。個小食亭無乜特別，特別在佢啲枱椅，竟然滿有南歐風情。放杯咖啡在此打個卡，又可以扮下偽旅行。
從噴水池上一層就見到一條林蔭大道，在夏天除了提供陰涼的樹蔭外，到了秋冬天時，還是紅葉之地。不過這兒的紅葉比較不「平易近人」，高到只能仰望，未能合照。
據維基的資料，早期的「植物公園」扮演著將西方人從中國採集的未知植物物種出口到邱園（Kew Gardens）以及其他西方植物園的中轉站。老編唔知點解英國人咁鍾意採集植物種類，不過兵頭花園又真係種咗好多款植物。愛花之人都可以唔同時節時碰碰運氣，睇吓可以同咩花打吓卡。
除咗動植物，公園內仲有一啲具歷史價值的建築物如1866年建成的前演奏台（現在用作涼亭），1958年開始擺放的英皇佐治六世（即現時英女王的老豆，電影《The King’s Speech》的主角 ）的銅像。
作為香港最古老既公園，兵頭花園究竟係幾多歲竟然唔同資料有唔同數字，見過有人話155，有人話160， 不過官方而家就統一係150年，可能係計佢完全完工啦。點都好，重要既已經唔係幾多歲，而家我地仲會唔會去珍惜呢個在市中心俾人唞一下氣既地方，如果我地對佢都不屑一顧，幾多歲、幾有歷史價值，都係無意義了～
途經香港動植物公園的公共交通路線：
1. 從中環開出 3B, 12, 13
2. 從金鐘開出 12A, 12M, 40M, 40P, 40
3. 從銅鑼灣開出 23B
4. 從北角開出 23
5. 從樂富開出 103
參考資料：
日佔時代香港大正公園的香港神社前世今生
伸延閱讀：
龍脊 — 新手也可以行到揚威國際的行山徑
青衣公園 —10分鐘睇紅葉
沈雲山 — 好有日本feel！全斜路20分鐘走上山看飛鵝山
按此瀏覽更多一小時以內的市區行山路徑
Leave a Reply