天氣不似預期這句話真的好用，尤其用於行山時，總有時㨂過日子睇好天氣報告才出門，然後一下子風雲變色，喊都無謂。今次老編就在晴朗的一天出發，淒風苦雨中收隊。
話說，唔係，係傳說中的大澳虎山又易行又靚，係打卡呃like的姣啲防。於是慣咗由東涌行入大澳的老編，今次諗住輕輕鬆鬆鄧梓峰咁搭船入大澳，行個BB級難度既山（老人家唔捱得）呃吓飲呃吓食又一day。
入大澳有好多種方法，除咗學古人咁行之外，仲可以喺東涌或梅窩搭巴士、中環或屯門搭船入。
屯門碼頭每日有四班開往大澳的船、星期六、日及公眾假會開多幾班。但始終班次疏，想用呢個方法入去嘅朋友最好先上網睇睇船期，仲要預早小小買飛，因為船仔細細，好快就滿。
屯門入大澳的船會經東湧、沙螺灣再到大澳，全程約一小時。如果可以坐在船頂看著藍天白雲進發，真是心曠神怡。可惜老編當日由屯門碼頭出發時仲藍天白雲，到沙螺灣時天色已變灰，變臉速度快過變節小人。
上了碼頭，沿著大澳永安街，到了分叉路向左走，過那條核爆唔知會唔會爛的大橋，繼續向大澳街市進發。
經過街市繼續向前行，大概十分鐘左右就到達少林寺，無錯，係少林寺，不過無18銅人喺度，可以放心行過路過。
喺少林寺左邊有一條小路，行入去就會見到上山的梯級，一路上就係虎山喇！
虎山整條山路都鋪上了石塊，加上扶手，十分好行。由少林寺上到「山頂」大概只需十五分鐘左右，真的快過打針！
雖然山仔細細，但由於大澳附近的山頭也是矮矮細細的，沿路也可以眺望到大澳遠處的景色。
樓梯的盡頭本來有一個頗為開揚的小平台可以讓人暫停腳步，駐足眺望四周美景，可惜無厘頭地放了個海豚雕塑，話佢醜唔算，但藝術內涵近乎零，卻佔據了最好的觀景位置，實在多餘兼無聊。
傳說這兒看日落配上紅色扶手是勁靚，不過當天下著微雨兼大風，日光晚霞沒有、紅色扶手望上去瘀血一片……
大澳虎山實在易行又方便，是適合男女老幼郊遊的好地方。但如果一心想拍美照呃like的話，就了有心理和技術準備。事關天氣隨時不似預期：好景不會每日常在，而IG/FB上的美照，除了配合天時地利老天爺眷顧外，或多或少也要filter相助，才能成功呃like。
或者就好似做人咁，那怕你是父母計好時間讓你贏在出生前起跑線，還是少年得志風光無限，年輕時總會以為前面還有很多十年可以揮霍、還有很多高峰可以攀上，甚至喜馬拉雅山也不放在眼內。卻不知沒有人甚至神能保證天色常藍，就在躊躇滿志、意氣風發之時，出人意外的世道、天災、人禍甚至人猿襲地球你估佢唔到的事殺你一個措手不及，一刻的光輝也許已是頂峰。再回頭，不到百年也已大半生。
不過，沒要緊，或許此生攀不到喜馬拉雅山，看不到大地在你腳下、白雲在身邊飄浮的美景，仍然可以登上虎山這小峰。其實喜馬拉雅山雖然比虎山高上十倍，卻看不到自甘墮落oops，係自甘落海的港珠澳大橋這種有趣景緻。或許，當你不再追逐萬人景仰的掌聲，轉而欣賞握在手中的美麗，你已不再輕狂年少，甚至懂得為自己戴上薔薇色的濾鏡，讓平凡的人生也變得IGable。
大澳虎山
需時
0.5小時（慢行連拍照1小時）
難度
0.5星（1星最易，5星最難）
起點交通
- 東涌乘11號巴土
- 梅窩乘1號巴士
- 中環/屯門乘船
微雨也能行山系列
大潭水塘 — 微雨也能行山（I），睇過百年古蹟
九龍四水塘， 九龍水塘 、九龍接收水塘、九龍副水塘和石梨貝水塘— 微雨也能行山（II）
微雨也能行山（III）— 金鐘站半小時走上 寶雲道行山
Leave a Reply