如果我有多一張火車票， 你會唔會跟我走？
去邊？
巴黎。 喺尖沙咀搭火車去巴黎。
今時今日一張機票已經可以環遊世界， 但原來在「 不久 」的從前， 即大約一百年前， 民航機莫說未普及， 簡直無人諗過可以隨便搭。 幸或不幸， 因為世界大戰， 航天技術大大提升（ 人類對打人既科技總係好熱衷 ）， 至令一般人都可以想飛就飛。
所以喺二十世紀初， 要去世界另一端唔係搭船就係搭車。
當時西方國家以巴黎為首， 而東方既盡頭， 唔係上海，而係尖沙咀！
1. 香港鐵路的由來
2. 尖沙咀火車站落成
3. 火車站的消失
4. 保育火車站運動
5. 散落四周的古物
香港鐵路的由來
1908年， 時任港督盧吉認為如果香港唔起返段鐵路連接廣州鐵路， 繼而接連到歐洲的話， 呢個深水港都無乜用了。 所以嗱嗱聲研究吓點起。
當時有兩個方案， 一個係尖沙咀出發， 經深水埗， 沿藍巴勒海峽、 經荃灣、 青山灣、 屯門新墟再入元朗。 今日睇返， 係唔係有啲熟口面？ 無錯呀， 咪就係西鐵線囉！ 呢條線比起現行的東鐵線嚟講， 就係一路較為平坦， 要開山劈石既隧道較短， 換句話說技術需求無咁高。 缺點就係路線較長， 而且所經之地較為荒涼。
由於東鐵路線較短， 而且途經當時新界較繁華的大埔， 所以雖然要在筆架山開鑿隧道， 港英政府仍選擇了現時的東鐵路線， 並於 1906 年正式動工。 到 1910 年通車， 換言之， 在尖沙咀上火車， 搭到上廣州， 經過北京、 大連到西伯尼亞， 然後就可以到俄羅斯同歐洲， 最終到達巴黎。 不過當時這個歐亞鐵路的東方終點站仲未起好， 還要等 6 年之後， 尖沙咀火車站才登場。
尖沙咀火車站落成
1916 年， 尖沙咀火車站正式落成。 這座具愛德華巴洛克式風格的建築， 樓高兩層， 以紅磚及花崗岩建成， 配以三角形山牆及羅馬式石柱。 客運月台建於南面， 面對維多利亞港， 火車沿梳士巴利道及漆咸道而行， 路軌側已是海岸線所在。 從此， 香港接通了全世界， 可以在優雅的尖沙咀火車站上車， 然後一直通往巴黎。
火車站還設有鐘樓和一條門廊， 連接天星碼頭， 讓從港島乘天星小輪來的乘客不用日曬雨淋便能走到火車站。 可惜這條門廊因要配合碼頭的發展， 在 50 年代後期被拆卸了。
而今天我們熟悉的鐘樓雖然與火車站同時興建， 但要到 1920 年才開始安裝大鐘， 於 1921 年 3 月 22 日下午正式開始運作。 除了在香港日治時期曾經被停止運作， 該大鐘一直運行至今。 不過鐘樓的響鬧報時裝置自 1950 年代初起被移走， 直至 2010 年 9 月， 銅鐘才重置於尖沙咀鐘樓的地下。
上面兩張圖拍攝位置幾乎一樣，上圖應該是1920年代，下圖是1970年代，可見火車站及鐘樓周遭都變了不少。
火車站的消失
尖沙咀火車站的位置除了是火車終站，其實亦是巴士總站、天星碼頭，實在是重要的交通樞紐。但相信由於天星碼頭不能用作貨運用途，由北方而來的貨物未能方便地轉運至香港。所以從1950 年代開始， 政府及九廣鐵路已有研究搬遷火車站，最後選擇了紅磡，亦把海底隧道出口建在那兒， 把香港島與九龍以至新界的陸路交通連接起來。而空出來的火車軌及火車站海傍土地則會作商業及文化藝術發展。
保育火車站運動
不過搬還搬， 唔駛拆咗佢啫， 以前啲人真係唔識寶。 咁又唔好鬧得哂前人… 無錯， 四、 五十年前保育聲音未必如今日響亮， 但唔代表無人出聲喎。 當年其實唔少團體都有出聲， 包括： 長春社、 香港文物學會（ Hong Kong Heritage Society ）與尖沙咀街坊福利會。 他們不單向港督麥理浩請願， 更收集了一萬五千個簽名（ 支持者甚至包括鄉議局、 皇家規劃師學會和建築師學會 ）， 直接向英女王請願。
除咗寫信請願簽名外，香港文物學會亦提出了具體的改善方案，包括把水警總部（ 現1881 ） 涵蓋在內， 配合未來地下行駛的尖沙咀九廣鐵路段， 使之成為一個集合交通、 文化及休閑娛樂的空間。
可惜無論有多少聲音及方案，最終英女王都否決保留。有人認為港府想切除港人在尖沙咀火車站到大陸的共同回憶，亦有指這是政府的去殖民地政策。無論原因如何，這幢極有藝術價值的建築物於1978年2月化為廢墟。
散落四周的古物
今日再看 6、70 年代的照片， 發現舊火車站、 鐘樓與天星碼頭區是一個很優雅悠閒的區域， 怪不得有大量歷史照片留下， 因為太多人替她拍照了。 可惜的是今天只剩孤零零的鐘樓在原地， 與六根羅馬柱在尖東， 天各一方地讓人憑弔。 假如歷史建築是人與舊時代的連接點， 這些散落各地的零碎部件只會令人摸不著頭腦， 極其量只是一件漂亮的古董擺設， 沒有根， 也沒有情。
昔日的光影與記憶， 那夾雜亞熱帶的微溫與花都的綺麗， 已隨「 發展 」 步伐跌落塵埃中。 舊 尖沙咀火車站 於1975年遷往紅磡， 因著各方的反對聲音， 只保留了鐘樓， 終在 1990 年被列為法定古蹟。
2021 年乃鐘樓正式運作 100 周年， 尖沙咀鐘樓於 12 月 9 日傍晚六時重新響鐘， 是鐘樓相隔 71 年再次響鐘。
參考資料
尖沙咀海濱的前世今生 (上)
Kowloon – Canton Railway (British Section) – Kowloon Station Relocation
HONG KONG’S TRAIN TO CHINA: A BRIEF HISTORY OF THE KOWLOON-CANTON RAILWAY
西鐵的前世今生（一） : 由1898年殖民地時代起程
當日睇真啲： 從遷站前後香港土地利用的發展，看尖沙咀總站遷站的因由
尖沙咀海濱發展、大眾集 體記憶和保育
《尖前顧後》第十一集：尖沙咀火車站保育事宜
尖沙咀海濱：歷史、城市發展及大眾集體記憶 – 蔡思行著
Leave a Reply